მეორე ტურის ცენტრალურ შეხვედრას თბილისმა უმასპინძლა. მიხეილ მესხის სახელობის სტადიონზე ეროვნული ლიგის პირველი თბილისური დერბი გაიმართა. „ლოკომოტივმა“ „დინამოს“ უმასპინძლა და მინიმალური ანგარიშით 1:0 დაამარცხა მეტოქე. მატჩი ორმხრივი შეტევებით წარიმართა და ორივე გუნდის კართან საკმაოდ ბევრი მომენტი შეიქმნა. ერთადერთი გოლი 57-ე წუთზე გავიდა, ირაკლი კომახიძის გამოზომილ ჩაწოდებას საჯარიმოში უყურადღებოდ დარჩენილი ნოდარ ქავთარაძე გამოეხმაურა და ახლო მანძილიდან სერგი ლიტოვჩენკოს აუღებელი დაურტყა. გაშვებული გოლის შემდეგ დინამოელები უფრო აქტიურად შეტევას ცდილობდნენ, მაგრამ ყველაზე რეალური მომენტი რისი შექმნაც მათ შეძლეს საჯარიმო დარტყმა იყო, რომელიც ოთარ კიტეიშვილმა არაზუსტად შეასრულა. საბოლოოდ ანგარიში აღარ შეცვლილა და ლოკომ ზედიზედ მეორე გამარჯვება მოიპოვა.
მსაჯები
- არბიტრი - ლ. სილაგავა
- პირველი ასისტენტი - ლ. ვარამიშვილი
- მეორე ასისტენტი - ს. სპიცინი
- მეოთხე მსაჯი - ა. ნონიკაშვილი
- პირველი დამატებითი ასისტენტი - გ. ყრუაშვილი
- მეორე დამატებითი ასისტენტი - შ. ქუხილავა
