დასრულდა კრისტალბეთ ეროვნული ლიგის მე-14 ტური. დღეს ოთხი მატჩი გაიმართა და ორი ფრე დაფიქსირდა, ერთ შეხვედრაში 9 გოლი ვნახეთ: ეს ლიდერისა და აუტსაიდერის დაპირისპირებაში. ასევე საინტერესოა, რომ წყალტუბოს სამგურალმა ზედიზედ მეხუთე თამაში მოიგო...
ბოლნისის სიონმა ზედიზედ სამი წაგების მერე პირველი ქულა მოიპოვა. სიონმა შინ 0:0 ითამაშა გორის დილასთან, რომელსაც ბოლო 3 შეხვედრაში გოლი არ გაუტანია. ბოლნისელები ბოლოსწინა ადგილზე დარჩნენ 11 ქულით. დილა კი მეხუთე ადგილზეა, თუმცა მეორეადგილოსანს მხოლოდ 3 ქულით ჩამორჩება.
გაგრამ თბილისის დინამო არენაზე წყალტუბის სამგურალთან 0:2 წააგო და მეშვიდე ადგილზე დარჩა. და სამგურალს რაც შეეხება, გუნდი მესამე პოზიციაზეა და მეორეადგილოსან დინამო თბილისს გაუთანაბრა ქულებით.
გიორგი მიქაძის გაწვრთნილმა სამგურალმა ზედიზედ მე-5 მატჩი მოიგო. გაგრასთან გოლები თედო კიკაბიძემ და ჯეფერსონ ჯერალდომ გაიტანეს. საინტერესოა, რომ ორივესთვის ეს სადებიუტო გოლი იყო მიმდინარე სეზონში.
ტორპედომ ქუთაისის რამაზ შენგელიას სტადიონზე 1:1 ითამაშა თელავთან. ქუთაისელები 77-ე წუთზე გიორგი კუხიანიძის გატანილი პენალტით დაწინაურდნენ, თუმცა მალევე გიორგი ხაბულიანმა გაათანაბრა. ეს 18 წლის ხაბულიანის პირველი გოლია კრისტალბეთ ეროვნულ ლიგაში.
ამ გუნდების დაპირისპირება პირველ წრეშიც ფრედ დასრულდა, ოღონდ 0:0.
გუნდებს ადგილები არ შუცვლიათ. თელავი მეექვსეზე დარჩა, ტორპედო - მერვეზე.
დინამო ბათუმმა 7:2 სძლია ლოკომოტივს, რომელსაც 14 ტურში 14 წაგება აქვს. ლოკოდან გიორგი ქველაძემ და გიორგი ომარაშვილმა გაიტანეს: ორივე მათგანმა სადებიუტო გოლები მიითვალა სეზონში...
რაც შეეხებათ ბათუმელებს, ორ-ორი ბურთი გაიტანეს ზურიკო დავითაშვილმა და ჯამბულ ჯიღაურმა. დავითაშვილს ამ ტურამდე ბათუმელთა მაისურით არ ჰქონდა გატანილი. კიდევ თითო-თითო გოლი კი ხვიჩა კვარაცხელიამ, მილან რადინმა და თორნიკე გაფრინდაშვილმა დაამატეს.
დინამო ბათუმი 5-ქულიანი ჰანდიკაპით ლიდერობს.
