94-ე წუთი... ტორპედომ დილას მოუგო

მეცამეტე ტურის პირველი მატჩი კრისტალბეთ ეროვნულ ლიგაში: ქუთაისის ტორპედომ გორის დილას 2:1 მოუგო. ქუთაისელებმა გადამწყვეტი გოლი მსაჯის მიერ დამატებულ წუთებზე გაიტანეს...

ტორპედო 2:1 დილა 

ტორპედომ დაძაბულ თამაშში მოუგო დილას. ქუთაისელები 43-ე წუთიდან რიცხობრივ უპირატესობაში იყვნენ, რადგან დილას ნახევარმცველი ბლანკსონ ანოფი მეორე გაფრთხილების გამო გააძევეს.

57- ე წუთზე ტორპედოს კაპიტანმა ვლადიმერ მამუჩაშვილმა კარგად შეაყოლა ბურთი ფელიპე პირესს, რომელიც ჟოაო არაუჟომ წააქცია და დაინიშნა პენალტი, რომელიც გიორგი არაბიძემ გამოიყენა - 1:0.  

83-ე წუთხე დილამ გაათანაბრა: არაუჟომ მარცხნივ კარგი პასი გაუკეთა ჟან-მარკ ტიბუეს, მის ჩაწოდებულს კი მოჰყვა ლაშა მენთეშაშვილის დასწრებაზე თამაში და ბურთი კარში აღმოჩნდა - 1:1.

მსაჯის მიერ დამატებულ მეოთხე წუთზე კი არაბიძემ წლეულს მორიგი, მეექვსე, საგოლე პასი გააკეთა: ჩაწოდება და მატეო შიმიჩის თავური - 2:1.

დილას მწვრთნელის რანგში დებიუტი ჰქონდა ლევან კორღალიძეს. მას კრისტალბეთ ეროვნულ ლიგაში ზედიზედ 30 წაუგებელი მატჩი ჰქონდა (თბილისის იბერია 1999-ში) და აი, დილაში შეწყდა ეს სერია.

ამ დროისთვის ტორპედო მეორე ადგილზეა, დილა კი - მეოთხეზე. მათ შორის მხოლოდ ერთი ქულაა სხვაობა.