ვაწაძის დუბლი... დინამო თბილისმა სამგურალს მოუგო

დინამო თბილისმა წყალტუბოში სამგურალს 2:1 მოუგო. ეს კრისტალბეთ ეროვნული ლიგის მეცხრე ტურის პირველ მატჩში....
თემურ ქეცბაიას დებიუტი, დინამოელთა მთავარი მწვრთნელის რანგში, წარმატებული გამოდგა. 

სამგურალი 1:2 დინამო თბ 

დინამო თბილისმა შვიდმატჩიანი მოუგებელი სერია შეწყვიტა. აი, სამგურალმა კი ზედიზედ მეოთხედ წააგო. 

პირველი გოლი 33-ე წუთზე ვნახეთ. დინამოელთა ნახევარმცველმა ნიკა ნინუამ კუთხური ჩააწოდა, იქ სამგურალის ბრაზილიელ მცველ ვინისიუსს ბურთი ხელზე მოხვდა. დაინიშნა პენალტი და მათე ვაწაძემ ზუსტად დაარტყა. 

ვაწაძემ, რომელიც 37 წლის გახლავთ, მეორე ტაიმში კიდევ ერთი გოლი მიითვალა: მან როდრიგუ რამუშის პასის მერე დაბალი დარტყმით გაზარდა სხვაობა. 

მეორე ტაიმის შუაში დინამო ათი კაცით დარჩა: არბიტრმა გოგა კიკაჩეიშვილმა უხეშობისთვის პირდაპირ წითელი ბარათი უჩვენა ირაკლი სირაძეს. სხვათა შორის, სირაძე ოთხი წუთის შესული იყო მინდორზე (სწორედ ვაწაძე შეცვალა). 

სამგურალი ბევრს უტევდა და 82-ე წუთზე ბრაზილიელმა მცველმა პაბულუ რიანმა თავურით გაიტანა. დარჩენილ დროში ანგარიში აღარ შეცვლილა.