მეშახტეს ისტორიული მოგება; და ფრე წყალტუბოში

კრისტალბეთ ეროვნულ ლიგაში მესამე ტური დასრულდა. ხუთშაბათს ორი მატჩი გაიმართა: ტყიბულის მეშახტემ გორში 1:0 მოუგო დილას, ხოლო წყალტუბოს სამგურალისა და დინამო ბათუმის დაპირისპირება 1:1 დასრულდა.

დილა 0:1 მეშახტე 

ტყიბულის მეშახტემ ისტორიაში პირველი გამარჯვება მოიპოვა კრისტალბეთ ეროვნულ ლიგაში. როგორც იცით, მეშახტე დებიუტანტია და 36-ე ქალაქია, რომლის გუნდსაც საქართველოს მთავარ ლიგაში უთამაშია. 

დღევანდელი თამაში დაძაბული გამოდგა და ერთადერთი გოლი გავიდა: ტყიბულელთა გარემარბმა დიმიტრი ღურწკაიამ მარცხენა ფლანგზე ბრძოლაში მოიპოვა ბურთი, პასი გაუკეთა ირაკლი სიხარულიძეს, რომელიც ცენტრისკენ შეიწია და დაბალი დარტყმით გაიტანა. ეს მეორე ტაიმის შუაში მოხდა - 0:1. 

საინტერესოა, რომ შარშან სიხარულიძე იბერია 1999-ში როცა თამაშობდა, ორჯერ გაუტანა დილას და ორივეჯერ 1:0 მოიგო მისმა გუნდმა. ახლა მესამე შემთხვევააა, ოღონდ ამჯერად მეშახტეს სახელით.

სამგურალი 1:1 დინამო ბთ 

პირველ ტაიმში ბათუმელები დაწინაურდნენ ლუკა ქაფიანიძის გოლით. რევაზ ჩიტეიშვილმა აუტი ჩააწოდა, სამგურალის მეკარე არსენ სიუკაევმა გამოსვლისას ბურთი ხელებში ვერ შეიმაგრა და ქაფიანიძემაც დაამატა.

ბათუმელები დიდხანს იგებდნენ, 84-ე წუთზე კი ნიკა ხორხელის ჩაწოდებას მოჰყვა ველისოლის თავური და 1:1. 

ბათუმელებს ორ მატჩში ორივე ფრე აქვთ, სამგურალს კი ორი ფრის გარდა ერთი გამარჯვებაც აქვთ მოპოვებული.