გახსნის მატჩი: დებიუტანტმა სპაერმა ქუთაისში მოიგო

კრისტალბეთ ეროვნული ლიგა დაიწყო. სეზონი ქუთაისში გაიხსნა, სადაც ტორპედომ დებიუტანტ თბილისის სპაერს უმასპინძლა. 

ტორპედო 1:2 სპაერი

ქუთაისელები იგებდნენ, მაგრამ საბოლოოდ სპაერმა გაიმარჯვა. 

ტორპედო სწრაფი გოლით დაწინაურდა. პირველივე წუთზე, კერძოდ, 32-ე წამზე გიორგი კოხრეიძემ ცხრიანში ძლიერად დაარტყა და 1:0. 

53-ე წუთზე ტორპედო ათი კაცით დარჩა, რადგან ალეკო ბასილაძემ მეორე გაფრთხილება მიიღო. გავიდა კიდევ რამდენიმე წუთი და სპაერმა რიცხობრივი უპირატესობა გამოიყენა: მასპინძელთა მცველმა მატეო შიმიჩმა თავის საჯარიმოში ფეხი დაუდო გიჩა ცირდავას, რის გამოც პენალტი დაინიშნა და გიგა სამხარაძემ ზუსტად დაარტყა. ესეც სპაერის პირველი გოლი კრისტალბეთ ეროვნული ლიგის ისტორიაში.

ბოლოს კი თბილისელებმა გადამწყვეტი გოლი გაიტანეს, თან ძალიან ლამაზი. ნიკა ჩაგუნავას რბილად ჩაწოდებულს მოჰყვა ლაშა კოხრეიძის ეფექტური მაკრატელა და 1:2.