ტორპედომ გორში დილას მოუგო, სამტრედიამ შინ დინამო თბილისს აჯობა

კრისტალბეთ ეროვნულ ლიგაში 29-ე ტურის ორი მატჩი გაიმართა. სამტრედიამ კვლავ მოიგო, ამჯერად მოქმედ ჩემპიონ დინამო თბილისს სძლია; ქუთაისის ტორპედომ კი გორში დილას აჯობა... ამ შეხვედრას საქართველოს ნაკრების მწვრთნელი ვილი სანიოლიც დაესწრო.

სამტრედია 3:2 დინამო თბ 

სამტრედიამ კარგი სერია გააგრძელა, ბოლო ექვს მატჩში ხუთი მოგება მოუგროვდა და ერთი ფრედ დაასრულა. თანაც, სამტრედიელებმა ამჯერად მოქმედ ჩემპიონს სძლიეს - 3:1.

თავის მხრივ, დინამო თბილისის 9-მატჩიანი დაუმარცხებელი სერია შეწყდა. ანდრეს კარასკოს პირველი წაგება დინამოელთა მთავარი მწვრთნელის რანგში.

სამტრედია ზვიად ნაჭყებიას სწრაფი გოლით დაწინაურდა. ეს ნაჭყებიას მეშვიდე გოლია სეზონში.

მეორე ნახევარში დინამომ გაათააბრა: კუთხურს მოჰყვა საბა ხვადაგიანის თავური, ალექსანდრე კალანდაძემ კი მიმართულება შეუცვალა ბურთს და 1:1.

ხუთ წუთში სამტრედიელები ისევ წინ გავიდნენ, ამჯერად ჩრდილომაკედონიელმა ალექსანდარ მიშოვმა მოახერხა გრძელი პასის დამორჩილება და კარგად შეასრულა. მიშოვმა მეოთხე გოლი გაიტა კრისტალბეთ ეროვნულ ლიგაში და ეს ბოლო ხუთ ტურში მოახერხა - 2:1.

მე-80 წუთზე კი შეცვლაზე შესულმა რევაზ ინჯგიამ ახლო კუთხეში გაუტანა გიორგი ლორიას და 3:1.

მხოლოდ მსაჯის მიერ დამატებულ წუთებზე მოახერხა დინამო თბილისმა სხვაობის შემცირება, ანზორ მექვაბიშვილმა საჯარიმოს მისადგომებიდან აუღებელი დაარტყა - 3:2.

დილა 0:1 ტორპედო 

ქუთაისის ტორპედომ ამჯერად გორში დილასთან მოიგო 1:0 და ერთბაშად სამი საფეხურით ზემოთ აინაცვლა: მეექვსედან მესამე ადგილზე.

მეორე წრის მერე ალბათ ცოტა თუ წარმოიდგენდა, რომ ტორპედო სამეულამდე მიაღწევდა, რადგან ქულებში ჩამორჩენა ძალიან დიდი იყო.

გორში ერთადერთი გოლი გიორგი არაბიძემ გაიტანა: ფლანგიდან ცენტრისკენ შეიწია, დაარტყა, რიკოშეტი და 0:1... ეს 28-ე წუთზე მოხდა. არაბიძეს მიმდინარე სეზონში 10 გოლი მოუგროვდა.

მეორე ტაიმში არაბიძეს დუბლის შესრულებაც შეეძლო, მაგრამ პენალტი ვერ გამოიყენა: ევგენ კუჩერენკომ აუღო. 

მატჩს საქართველოს ნაკრების მწვრთნელი ვილი სანიოლი დაესწრო. როგორც იცით, ნაკრებს უახლოეს პერიოდში ორი საშინაო მატჩი ელის. 12 ოქტომბერს ტაილანდთან ამხანაგური და 15 ოქტომბერს შესარჩევი კვიპროსთან.