კალენდარი

შაბათი, 3 დეკემბერი

ახალი ამბები

საბურთალომ ზედიზედ მესამედ მოიგო, ორი თამაში ფრედ დასრულდა

სანაკრებო დღეები დასრულდა და საქართველოს კრისტალბეთ ეროვნული ლიგა განახლდა. 28-ე ტურის სამი მატჩი გაიმართა და ისე მოხდა, რომ მასპინძელს გოლი არ გაუტანია. საინტერესოა, რომ საბურთალომ ზედიზედ მესამედ მოიგო, სამგურალმა კი პირიქით - ზედიზედ სამჯერ წააგო.

გაგრა 0:0 დილა 

თბილისის დინამო არენაზე გაგრამ და დილამ 0:0 ითამაშეს. გაგრას 7 ტურია არ მოუგია და ზედიზედ 5 თამაშია, გოლი არ გაუტანია. დილას კი ექვსმატჩიანი წაუგებელი სერია აქვს.

ისე, ამ ორ გუნდს შორის ურთიერთშეხვედრებში მიმდინარე სეზონში თანაფარდობაა: თითო მოგება-წაგება და ორი ფრე.

თელავი 0:0 ლოკომოტივი 

თელავი-ლოკომოტივის შეხვედრაც უგოლოდ დასრულდა. მსაჯის მიერ დამატებულ წუთებზე მასპინძელთა მარჯვენაფლანგელმა ცოტნე კაპანაძემ პენალტი ვერ გაიტანა: ოთო გოშაძემ მოიგერია...

გიორგი ცეცაძის გაწვრთნილ თელავს 9 ტურია არ მოუგია, თუმცა მეშვიდე ადგილზე ჯერჯერობით რჩება. რაც შეეხება ლოკომოტივს, წლეულს პირველად მოახერხა სტუმრად ქულის აღება...

და კიდევ, გიორგი მინაშვილის დებიუტი იყო ლოკოს მთავარი მწვრთნელის პოსტზე.

სამგურალი 0:3 საბურთალო 

სამგურალმა შინ 0:3 წააგო საბურთალოსთან. აღსანიშნავია, რომ ეს ზედიზედ მესამე მარცხია წყალტუბოელებისთვის და სამივეჯერ ერთნაირი ანგარიშით - 0:3. სამგურალი მეხუთე ადგილზეა.

რაც შეეხება საბურთალოს, თემურ შალამბერიძის გაწვრთნილებმა ზედიზედ მესამედ გაიმარჯვეს და საერთო ანგარიშით 11:1. საბურთალო მეექვსეზეა, თუმცა ცხრილში სიმჭიდროვეა და მესამეადგილოსანს მხოლოდ 3 ქულით ჩამორჩება.

გოლებზე: სამგურალის მცველ გიორგი თევზაძეს აეჭრა საკუთარ კარში და 0:1... პირველი ტაიმის ბოლოს ოთარ მამაგეიშვილმა გაიტანა და ეს მისი პირველი გოლია სეზონში. მეორე ნახევარში კი გიორგი გულიაშვილმა ახლოდან დარტყმით საბოლოო ანგარიში დააფიქსირა - 0:3.

ტურის დარჩენილი ორი მატჩი 2ოქტომბერს გაიმართება: 

სიონი - დინამო ბთ 

ტორპედო - დინამო თბ