ერთი გოლის ფასი: იბერია 1999-მა დილას მოუგო

კრისტალბეთ ეროვნულ ლიგაში მე-12 ტური დაიწყო. ერთი მატჩი გაიმართა, თბილისის იბერია 1999-მა 1:0 მოუგო გორის დილას და ლიდერობა გაიმყარა.მატჩის წინ საქართველოს ფეხბურთის ფედერაციამ პირველი წრის საუკეთესო მწვრთნელ ლევან კორღალიძესა და საუკეთესო ფეხბურთელ ივა გელაშვილს პრიზები გადასცა. 

იბერია 1999 1:0 დილა 

მოქმედმა ჩემპიონმა კვლავ მშრალად მოიგო. 1:0 გორის დილასთან. ეს ერთადერთი გოლი ირაკლი სიხარულიძემ გაიტანა მეორე ტაიმის შუაში. ირაკლიმ მეკარე დავით კერესელიძის მიერ მოგერიებული ბურთი გაგზავნა კარში.   

საინტერესოა, რომ სიხარულიძისთვის ეს 127-ე გოლია საქართველოს მთავარ ლიგაში. ამ მაჩვენებლით დაეწია ჯაბა დვალს და მასთან ერთად მესამე-მეოთხე ადგილებს იყოფს. პირველზეა ზურაბ იონანიძე 216 გოლით, მეორეზე - ლევან ხომერიკი (140).

გოლამდე და მერეც საკმაოდ იყო მომენტები. 0:0-ზე არბიტრმა ალეკო აფციაურმა პენალტი დანიშნა თბილისელთა კარში, მაგრამ შემდეგ VAR-ზე გადაამოწმა და გადაწყვეტილება შეცვალა. იმ მომენტში დილას შემტევ აბუბაქარ კონტესა და იბერიელთა მცველ დერეკ აგიაკვას შორის იყო ორთაბრძოლა. 

იბერია 1999-მა კრისტალბეთ ეროვნულ ლიგაში ბოლოს შარშან 18 სექტემბერს წააგო. ზედიზედ 28 მატჩში არ დამარცხებულა. ახლა იბერია 1999 7 ქულით უსწრებს დილას და ასევე დინამო ბათუმსაც, რომელსაც ამ ტურში ჯერ სათამაშო აქვს.